Riyadii Aan Qabay Ee Rajadeedu Idlaatay !! (Qaybtii -2aad )
Hargeysa (OWN)-Saaxiibkay sheekadii ii wad waxaanu ii tibaaxay in Ifraax oo ah gabadh ay sheeko wadaag ahaayeen muddo 6 bilood ah ,taasi oo ay isku barteen barta nternerka ee Face-book iyaga oo mudadaasi ay wada haysteen hogaanka hawaasha iyo beerla xawsiga ay iskuna noqdeen laba qof oo markaasi u muuqday danwadaag.
“Magaalada xageebaynu ka degnaa ?” waa dhex-taal hadda uu carabku ka xadaayo saaxiibkay oo inta uu I soo horfadhiistay si midab leh oo waliba Af iyo sharaxaad-gacmeeda uu itaalkiisa iskugu geeyey isku dayayana in uu ku soo koobo mahadho-sheekeed jiitamaysay 6 bilood oo habeenkeeda iyo maalinteedaba leh .
Waxaan xusuustay odhaah uu nin carbeed ii sheegay oo ahayd “ Carabku waxa keliya ee isaga oo aan laf lahayn wax jabin kara, waxaanu ka awood roonyahay qalbiga oo kaliya “.
Dadkuna kula kala awood roon Af iyo Adinba , waxaana jirta in qof in badan hadlaayey uu ka saamayn iyo waxyeelo badan yahay mid isagu si taxa dir iyo juuqyari ku jirtay wax ku tibaaxay .
Saaxiibkay waa Cumare ayaa waxa uu soo qaatay dhammaal fariin xoogan xambaaray oo ay u soo dirtay Ifraax kaasi oo soo jaray xawaare xoogan hase ahaatee waqti aan badnayn ka dib ku soo dhacay khaanadda fariimaha iyo sheekada ee uu Cumar ku leeyahay boggiisa Face-booka.
Waxaanu u dhignaa sidan “ Walaal haka baqanin inta aad noolahay in aanu noloshaa kugu cidleeyo”.
Waxa uu sheegay Cumar in aanay hore aqoon buuxda isku lahay n Ifraax hase ahaatee ay qalbigiisa weerar ku soo qaaday waqti ay adeegsatay kalimaadka sixirka ah ee ay haweenku ku dabtaan raga ee ay ka mid tahay Ifka noloshu waa adi, waxaad tahay maan qaboojiye , lama huraan , iyo qaarkale oo aad mooda in ay ka soo carfayso urtii geedkii miskigu .
Waxa hore loo odhan jiray “ Bidaar sibiq bay kugu gashaa “waxaa se uu Cumar taaganyahay Jacayl sibiq buu kugu galaa “.
Mawjadaha hadalka ama hirarka (Waves) waa waxa xiisaha gaarka ah u yeela sheeko wareedyada taasi oo ah in qofku hadba si hakag hoose u dhigo iyo kor u qaad ku jiro uu ku soo dhex daro sheekada uu tabinaayo,
Haddaba saaxiibkay Cumar ayaa waxa uu adeegsanayey hab dhac sheeko oo aan is idhi waxa laga soo dheehay dhacdo xusuuseedkii Abwaanka weyn ee Maxamed Ibraahim Warsame (Hadraawi) oo marka aan dhagaysanayo sheekooyinkiisa aan is idhaahdo malaa dhagtaada ayuu kala bakhalayaa in ay qaadato maqal buuxa taasi oo igu dhalisa in aad si hadalku kaa baxsanaayo aad dhagta u so jiido dhanka uu kaa xigo.
Cumar oo isagu ah nin haasaawe barad ah ayaa waxa ku soo horeeyey warmaha dareenka qalbiga isaga oo Ifraah u gudbiyey hadal u dhignaa in ay kala xaajooto hindise guur iyo mid gabadhnimo .
Hadalka marka aan loo meel dayeynin waxa si fudud loo odhan karaa hadbaa waxii uu qofkaasi isleeyahay iskaga dhagamari qofkan kale Qalbina waa miskiin
Waxay ugu soo jawaabtay Ifraax oo ay la qaadatay arrinkaasi Cumar in ay markii horeba u arkaysay mid waqtigiisa la dhaafiyey.Waxayna isla qaateen in ay guur sameeyaan iyaga muddeeyey waqti kama dambaysa ah .
Waad garan kartaa dareenka ku xeeran qorshe ay dad isla meel dhigeen, ku tala galka iyo u diyaar garawga iyo luminta hawlaha kale ee uu gali karo mid kasta oo ka mid ah labadaasi qof gaar ahaan geesta daacadnidu ku dhawdahay .
Marka ay marayso bishii 6 aad ee barashadii Cumar iyo Ifraax ayaa waxa isbedel luuqadeed ku yimi dhanka hadalkii iyo erey-isweydaarsigii Cumar iyo Ifraax , xidhiidhka iyo iska warhayntooda oo markii hore ahayd bilaa xuduud kuna eegayn waqtiyo ama amin gaar ah, waxayna uu ku soo ururtay waqti kooban iyo oo ay ku dhaxayso “ Igu soo celi, mashquul baan ahay , kor u hay iyo hadhaw ha inoo ahaato”.
Cumar waa uu dareemay isbedelka ku yimi guud ahaan muuqaalkii ay ku dheehanayd naacawda iyo fooraha suubani , waxa isaga laftiisa ku yimi hiyi kac uu su’aalo badan isku weydiinayo waxa uu khilaafay hadalkii ahaa “ Ceebtaada haddii ay 1000 qof ogyihiin hal qof ha oo kale ha u sheegin”
Waayo waxay noqonaysaa 1001 qof oo waa tiro sii korodhay…
La Soco Qaybta .. 3aad.
Cumar Cali Xasan (Cumar Seerbiya)
Oodweynenews.com,Hargeysa office
