Wefti Ballaadhan Oo Uu Hogaaminayo Cali Warancade Oo Si Weyn Loogu Soo Dhaweeyey Magaalada Gabiley

Gabiley(OWN)- Wefti culus oo uu hogaaminayo musharaxa Jagada Madaxwaynenimo ee xisbiga UDUB Cali Maxamed Warancade,  ayaa si weyn loogu soo dhaweeyey Gabiley ee xarunta gobolka Gabiley.

Waftigan oo markii ay gaadheen magaalada ku wareegay Suuqyada iyo Waddooyinka dhex mara gudaha Magaalada, ayaa waxay dadweyne badan kala hadleen xafiiska xisbiga UDUB Gabiley.

Musharaxan oo halkaa dadka kala  hadlay ayaa ugu horreyn si wayn ugu Mahad-celiyey Dadwaynihii soo dhaweeyey, Isaga oo sheegay in ay Shakhsi ahaantii ay tani u tahay Fursad, Sababtana uu ku sheegay: “Aad iyo aad ayaan idiinku mahad celinayaa Dadwaynahan iyada oo Milicda Cadceedu kulushahay noo taagan, ee sida wayn noo soo dhaweeyey, Maalintii iigu danbaysay ee aan ka Khudbadeeyo Gabiley, waxaan Ilaahay waydiistay in aanan Mar labaad imanin Gabiley ee Wali Degmo ah, Ilaahay wuu iga aqbalay Ducadii maalintaa aan ku ducaystay, oo waxaan maanta idinla hadlayaa idinka oo Gobolkii helay, iyo Aniga oo u socda musharax Madaxwayne. Gobolkani waa Gobolkaygii waa Gobolkii aan ku soo barbaaray Caruurnimadaydii oo waxaan deganaa Degmada Allaybaday, waa halkii aan Maalintii iigu horreysay aan Malcaamad Quraan ka bilaabay, qiimayn gaar ah ayuu igu leeyahay Gobolkani”. Ayuu yidhi Cali Maxamed Waran-Cade.

Waxa kale oo Cali Maxamed Waran-cade hoosta ka xarriiqay in hadii Xisbigoodan Udub Mar labaad la doorto ay Horumarka Somaliland ka bilaabi doonaan Gobolkan, Isaga oo sidoo kale qiray in Muddadii hore ee ay Talada Dalka Gacanta ku hayeen ay ku hawlanaayeen Adkaynta Nabad-Galyada Dalka, isaga oo Arrimaaha ka hadlaya waxa uu yidhi Cali Waran-Cade: “Markii hore ee aanu Tallada Dalka gacanta ku haynay waxaanu Awooda saari jirnay Adkaynta Nabad-galyada, hadii aad Reer Gabileyow kalsoonidiina na siisaan waxaan Ballan ku qaadaynaa in aanu horu-marinta Dalka ka bilaabi doono Gobolkan Gabiley, Maadaama, oo ay tahay Laf-dhabarta Somaliland, hoosna ha inoo ahaato’eh illayn Goboladii kale inama maqlayaane”. Ayuu yidhi Musharaxa jagada Madaxwaynenimo ee Garab ka mid ah Labada Garab ee Xisbiga Udub u qaybsamay Cali Maxamed Waran-Cade.

Axmed Xaaji Daahir Cilmi oo ah Musharaxa Jagada Madaxwayne-Ku-Xigeenka garabka Waran-Cade oo Isaguna halkaa ka hadlay ayaa Farta ku fiiqay Muhiimada ay leedahay Arlada Alle ku uumay Dadwaynaha Reer Gabiley, Waxaanu xusay in Mustaqbalka dhaw Hargaysa iyo Gabiley is gaadhi doonaan, oo Isku Magaalo noqonayaan, “Waxaa xisbigayaga ka go’an in aanu muhiimada saarno oo aanu ku garab galno Dadwaynaha Reer Gabiley sidii kor loogu qaadi lahaa wax soo saarkooda, Illaahaybaana Mahad leh ee Dadwaynaha Reer Gabiley dajiyey Buqcadani u wanaagsan Wax soo saarka Beeraha, iyo Carrada san, waxaan hubaa in dhawaan insha Allah ay is gaadhi doonaan Caasimada Somaliland iyo Magaaladani Gabiley”.Ayuu yidhi Musharaxa Jagada Madaxwayne-ku-xigeenka ee Garabka Cali Waran-Cade ee Xisbiga Udub Axmed Xaaji Daahir Cilmi.

Xubno ka tirsanaa Golihii Wasiirada ee Xukuumadii Daahir Rayaale oo kala ahaa Wasiirkii hore ee Wasaarada Hawlaha guud iyo Guriyeynta Siciid Sulub Maxamed, Wasiirkii hore ee Wasaarada Qoyska iyo Arrimaha Bulshada, Xildhibaan Baar Siciid oo Iyaguna halkaa ka hadlay ayaa si wayn ugu mahad celiyey Taageerayaashoodii Sida wayn ugu soo dhaweeyey Magaalada Gabiley, Iyaga oo dhamaantood tilmaamay dhaliilo ay leeyihiin Xukuumadani, iyo Waxqabadyo ay hore wax uga qabteen Gobolkan.

Waxa kale oo ay u Hambalyeeyeen Maayarka Magaalada Gabiley Marwo Khadra Xaaji Gaydh. Siciid Sulub oo halkaa ka hadlay ayaa yidhi: “Xukuumadayadii hore wax badan ayaanu ka qabanay Gobolkan Gabiley,  waxaad ogaydeen in Xukuumadayadii aanu heshiis la galnay Dawladda Itoobiya, waxaanay inoo sameeyeen Waddada Laamida ah ee u dhaxaysa Wajaale iyo Kalabaydh oo ay Jay inooga dhigeen, mana garanayo sababta Xukuumadani ay u dhamaystiri wayday…”. “Waxaan jecelahay in aan Fursadan uga faa’iidaysto in aan si wayn ugu Mahad-Celiyo Aniga oo ka tirsanaa Xukuumadii hore ee Daahir Rayaale, ahna Mas’uuliyiinta Xisbiga Udub Marwo Khadra Xaaji Gaydh Maayarka Magaaladan Gabiley oo ka tirsan Xukuumadan Kulmiye oo Iyadu Muddadan ay joogtay wax wayn ka qabatay Magaaladan waxaana wacan in qofkii wax qabta lagu hambalyeeyo”. Sidaana waxa yidhi Wasiirkii hore ee Wasaarada Hawlaha guud iyo Guriyeynta, Siciid Sulub Maxamed.

“Aniga oo ka mid ah Xildhibaanada Golaha Wakiilada waxaan ballan qaadayaa in Ajande kasta oo khuseeya Gobolkan Gabiley aan noqdo Qofka ugu horreeya ee ansixinaya, Ollolena u galaya sidii loogu wada ansixin lahaa”. Sidaana waxa tidhi Xildhibaan Baar Siciid oo ka mid ah Golaha Wakiilada Somaliland ee ka soo baxay Xisbiga Udub.

Oodweynenews.com, Hargeysa Office